ការរលើកម្ពស់សុខភាពផ្លូវចិត្តក្នុងចំណោមប្រជាជនដែលរងការប៉ះទង្គិចផ្លូវចិត្ត ហៅកាត់ថា IMARP
សមាគម អ៊ី. អឹម. ឌី. អា កម្ពុជា មានសេចក្ដីសោមនស្សដែលបានចូលជួបកិច្ចប្រជុំពិភាក្សាការងារជាមួយថ្នាក់ដឹកនាំខេត្តកំពង់ឆ្នាំង អង្គការ សមាគមជាដៃគូ ប្រមាណជា ២៧ស្ថាប័ន ក្រោមអធិតីភាព លោក ស៊្រន សំឫទ្ធី អភិបាលរងនៃគណៈអភិបាលខេត្តកំពង់ឆ្នាំង នារសៀលថ្ងៃអង្គារ ៧ រោច ខែទុតិយាសាឍ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី៨ ខែសីហា ឆ្នាំ២០២៣។
ជាមួយគ្នានេះដែរ លោកបណ្ឌិត ភឿន ប៊ុណ្ណា (ប្រធានគម្រោងប្រចាំខេត្ត) និង លោក ពៅ វណ្ណឌី (អ្នកសម្របសម្រួលបច្ចេកទេសប្រចាំខេត្ត) សម្រាប់គម្រោង “ការរលើកម្ពស់សុខភាពផ្លូវចិត្តក្នុងចំណោមប្រជាជនដែលរងការប៉ះទង្គិចផ្លូវចិត្ត” ហៅកាត់ថា IMARP បានចូលរួមស្ដាប់ការណែនាំ ក៏ដូចជាបានធ្វើការរាយការណ៍ជាសង្ខេប ស្ដីពីសកម្មភាពស្នូលនៃគម្រោងដែលបាននិងកំពុងអនុវត្តក្នុងស្រុកប្រតិបត្តិកំពង់ត្រឡាច ជូនអង្គប្រជុំផងដែរ។
ជាចំណាប់អារម្មណ៍វិជ្ជមាន លោកអភិបាលរង បានសំដែងនូវសេចក្ដីសោមនស្ស និងថ្លែងអំណរគុណដល់អង្គការសង្គមស៊ីវិល និងសមាគមពាក់ព័ន្ធដែលបាននិងកំពុងចូលរួមជួយអភិវឌ្ឍតាមមូលដ្ឋានមួយចំនួននៅក្នុងខេត្ត ដោយការចូលរួមទាំងនោះក៏បានជួយកាត់បន្ថយនូវភាពក្រីក្រមួយកម្រិតថែមទៀតសម្រាប់ប្រជាពលរដ្ឋក្នុងខេត្តកំពង់ឆ្នាំងផងដែរ។
លោកអភិបាលរង ក៏បានលើកទឹកចិត្តឱ្យមានកិច្ចជួបជុំពិភាក្សាបែបនេះជាបន្តទៀតដោយ ត្រូវធ្វើឡើងរៀងរាល់ត្រីមាស ក្នុងគោលបំណងលើកកម្ពស់កិច្ចសហប្រតិបត្តិការប្រកបដោយប្រសិទ្ធភាពខ្ពស់ និងភាពកក់ក្ដៅ រវាងមន្រ្តីថ្នាក់ដឹកនាំខេត្ត និង អង្គការសង្គមស៊ីវិលនិងសមាគមទាំង២៧ស្ថាប័ន ដែលក្នុងនោះមានសមាគមចំនួន ៦ ផងដែរ។
